GAJA er mikilvægt loftslagsmál
Helsti ávinningurinn af því að vinna lífrænan úrgang í GAJA er verulegur samdráttur í losun gróðurhúsalofttegunda. Hliðarávinningur af þessu ferli GAJA eru um 12.000 tonn jarðvegsbætis og 3 milljónir Nm3 af metani árlega. Metanið dugar til að knýja um 4-6.000 fólksbíla eða um 100 strætisvagna. Það gæti líka séð um 2.000 meðalstórum heimilum fyrir rafmagni.
Ávinningur af GAJA
Með vinnslunni í GAJA endurheimtum við bæði orku og næringarefni sem felast í lífrænum heimilisúrgangi og drögum úr losun gróðurhúsalofttegunda.
Urðun á lífrænum og brennanlegum úrgangi frá heimilum á höfuðborgarsvæðinu verður hætt í lok árs 2023. Það er gríðarstórt loftslagsmál þar sem sú ákvörðun og meðhöndlun á lífrænum úrgangi í GAJU kemur til með að spara útblástur um sem nemur allt að 90.000 tonnum af CO2 á ári.
Sérsöfnun á lífrænum úrgangi er lykilatriði við að tryggja hámarksafköst GAJU og hreinleika efnisins sem verður að moltu. Stefnt er að yfir 95% endurnýtingu á úrgangi frá heimilum á höfuðborgarsvæðinu þegar vinnslan verður að fullu komin í gagnið.
Öll vinnsla GAJU verður innandyra og þannig er komið til móts við þarfir nágranna stöðvarinnar hvað varðar algjöra lágmörkun á lyktarmengun. Hjá sambærilegum stöðvum í Evrópu er hluti vinnslunnar að jafnaði utandyra.
Jarðvegbætir úr lífrænum heimilisúrgangi
Uppblástur, jarðvegsrof og hnignun gróðurs er eitt stærsta umhverfisvandamálið sem Íslendingar standa frammi fyrir. Um 40% landsins telst vera talsvert, mikið eða mjög mikið rofið.
Jarðvegsbætir úr lífrænum úrgangi getur orðið öflugur liðsauki við uppgræðslu lands og hjálpar til við bindingu kolefnis í gróðri.
Þörf er á uppgræðslu á nokkrum stöðum í nágrenni höfuðborgarsvæðisins og ýmsir aðilar hafa sýnt áhuga á að nýta efnið til landgræðslu og í skógrækt, t.d. Landgræðslan, Skógræktarfélag Reykjavíkur og Gróður fyrir fólk í landnámi Ingólfs.
Þá eru ótalin önnur þau gæði sem felast í aukinni gróðurþekju á örfoka landi.
