24. júlí 2012
Tryggja þarf rekstraröryggi, gæði og framleiðslugetu til að anna eftirspurn metans
Um áramótin gátu tæplega 1000 bílar nýtt metan unnið úr hauggasi sem sogað er upp úr ruslahaugnum í Álfsnesi og hreinsað í ökutækjaeldsneyti. Nú eru bílarnir um 1200. Ekki þarf að fjölyrða um gildi þess að nota metan á ökutæki, eins og sjá má á heimasíðunni www.metan.is.
Sala á metani stefnir í að tvöfaldast á árinu 2012 miðað við árið 2011 og verða yfir 2 milljónir normalrúmmetra sem ígildir um 2,5 milljónum bensínlítra. Nýlega var endurnýjaður samningur við N1 um kaup á metani og samið við tvo aðila, Metanorku og Olís, um kaup þeirra á umtalsverðu magni af metani.
Því er nauðsynlegt að fjárfesta í búnaði og bættu skipulagi við söfnun og vinnslu á hauggasi í Álfsnesi. Með uppbyggingunni er stefnt að fullnýtingu á árlegri framleiðslugetu haugsins, miklu rekstraröryggi og góðum gæðum. Þar sem SORPA er eini framleiðandinn á metani sem ökutækjaeldsneyti á Íslandi verður að hækka söluverð á metani frá SORPU til að framleiðslan standi undir sér.
